A intelixencia artificial pon a disposición do profesorado ferramentas capaces de avaliar producións escritas de maneira automatizada e personalizada. Estas aplicacións analizan tanto os aspectos formais —gramática, ortografía, cohesión e estilo— como os relacionados co contido —pertinencia, claridade, argumentación e estrutura—, sempre en función dos criterios definidos polo usuario. O resultado son comentarios detallados, cualificacións xustificadas e mesmo suxestións de mellora, o que converte estas solucións nun apoio útil tanto para a avaliación formativa como para a sumativa.
No ámbito educativo, a súa incorporación favorece a obxectividade e a coherencia na cualificación, ao tempo que reduce o tempo de corrección docente e facilita a retroalimentación inmediata. Así mesmo, permite axustar o tipo de feedback ao nivel do alumnado e á natureza do texto, ofrecendo un recurso eficaz para a revisión, a reescrita e o perfeccionamento progresivo da expresión escrita.
Chatbots generalistas
Os chatbots xeralistas —como ChatGPT, Gemini, Copilot ou Deepseek— poden converterse nun recurso valioso dentro dos procesos de avaliación e cualificación, en especial cando se trata de analizar a competencia lingüística. Entre os seus usos destaca a posibilidade de medir a riqueza léxica e gramatical dun texto en relación cos descritores do MCERL, o que facilita unha valoración máis precisa do nivel acadado.
Así mesmo, poden empregarse para identificar e clasificar os erros recorrentes nas producións escritas dun mesmo alumno, xerando listaxes personalizadas que favorecen a retroalimentación e o seguimento individual. Por último, ofrecen apoio en tarefas como a elaboración de informes cualitativos, a proposta de cualificacións argumentadas ou a adaptación de criterios de avaliación a partir de exemplos reais, aplicables a calquera área ou materia.
Writing feedback de Magic School
A ferramenta Writing Feedback de MagicSchool está deseñada para elaborar comentarios personalizados sobre os textos do alumnado, adaptándoos ao nivel educativo e aos criterios definidos polo profesorado.
A partir dunha rúbrica ou de indicacións concretas, a intelixencia artificial detecta fortalezas, sinala aspectos a mellorar e ofrece suxestións claras, o que permite realizar unha avaliación formativa rápida e axustada. A súa utilidade é especialmente evidente en producións escritas extensas, xa que posibilita unha retroalimentación inmediata sen perder o carácter individualizado.