Nesta sección recóllense ferramentas de intelixencia artificial orientadas á conversa, tanto oral como escrita, con alumnado e profesorado. Algunhas, como ChatGPT, Copilot ou Gemini, permiten interactuar por voz en tempo real desde o móbil, mentres que outras, como Sesame ou Replika, ofrecen experiencias máis inmersivas e personalizadas, centradas no acompañamento emocional ou na conversa continua.
Estas aplicacións resultan especialmente útiles no ámbito das linguas, xa que lle brindan ao alumnado a posibilidade de practicar a expresión oral e escrita de forma natural, inmediata e en distintos idiomas. Non obstante, o seu potencial transcende o puramente lingüístico: en calquera materia do currículo, o estudante pode dispoñer dunha especie de titor persoal, sempre dispoñible, ao que formular dúbidas, solicitar explicacións ou conversar sobre os contidos de maneira oral, sen necesidade de escribir. Unha vía accesible, motivadora e eficaz para reforzar a autonomía e a interacción educativa.
Chatbots xeneralistas
Os chatbots xeralistas facilitan a práctica da interacción oral de maneira sinxela e flexible. Ferramentas como ChatGPT, Copilot ou Gemini incorporan modos de voz que permiten conversar coa intelixencia artificial en tempo real.
No caso de ChatGPT, a súa aplicación móbil ofrece un modo de voz avanzado (na versión premium) que posibilita manter diálogos fluídos co asistente. Copilot tamén inclúe esta función, dispoñible tanto na súa app como en Windows, mentres que Gemini a ofrece a través da súa aplicación móbil. Estas alternativas permiten establecer conversas naturais en distintos idiomas, o que as converte nun recurso especialmente valioso para o ámbito educativo.
Sesame
Sesame é unha ferramenta innovadora que explora o potencial da conversa oral con intelixencia artificial en tempo real. A súa tecnoloxía permite manter diálogos fluídos e naturais cun asistente que escoita, comprende e responde cunha voz case humana. A experiencia resulta moito máis realista e convincente que os modos de voz dos chatbots xeralistas, aínda que polo momento só está dispoñible en inglés.
A pesar de atoparse aínda en fase de investigación, as súas posibilidades educativas son moi prometedoras: acompañar ao alumnado en actividades de repaso oral, practicar idiomas ou resolver dúbidas de forma autónoma, en calquera momento e lugar. Combinado con dispositivos portátiles, como lentes con audio integrado, Sesame abre a porta a experiencias de aprendizaxe máis inmersivas e personalizadas.
Replika AI
Replika AI é un chatbot conversacional enfocado na relación emocional co usuario. Concibido como un compañeiro virtual dispoñible as 24 horas do día, ofrece un espazo de diálogo libre de xuízos, ideal para traballar o benestar emocional, a reflexión persoal ou a competencia comunicativa. No ámbito educativo, pode empregarse para practicar conversas informais en linguas estranxeiras. O seu principal valor reside na capacidade de xerar vínculos personalizados e proporcionar unha contorna segura de comunicación, o que o converte nun recurso interesante para titorías, orientación académica ou aprendizaxe autónoma.
LuzIA
LuzIA é un asistente de intelixencia artificial que funciona directamente en WhatsApp e Telegram, sen necesidade de instalar aplicacións adicionais. Permite realizar preguntas, traducir, resumir textos ou aclarar conceptos educativos de maneira sinxela. Tamén admite interacción mediante notas de voz: transcribe o audio e responde por escrito ou, se se solicita, cunha resposta en audio. Preséntase así como unha opción práctica para traballar a expresión oral, resolver dúbidas ao momento e fomentar o uso autónomo da IA na aula, todo desde unha aplicación de mensaxería cotiá.