A tecnoloxía text-to-space permite xerar contornos tridimensionais interactivos a partir de descricións escritas en linguaxe natural. Na práctica, o usuario só ten que indicar o que desexa ver —unha cidade futurista, unha escena histórica, un ecosistema natural…— e a intelixencia artificial transfórmao automaticamente nun espazo 3D navegable. Esta innovación, aínda en fase emerxente, supón un paso máis aló do clásico text-to-image, achegando a creación de mundos virtuais a calquera persoa, sen necesidade de coñecementos de modelado nin de programación.
No ámbito educativo, as súas posibilidades son especialmente interesantes: deseñar escenarios inmersivos para aprender historia, ciencias ou xeografía; crear simulacións que axuden a resolver problemas complexos; impulsar experiencias de narración interactiva; ou mesmo permitir que o alumnado constrúa os seus propios contornos como parte de proxectos creativos e colaborativos. Esta tecnoloxía ten o potencial de converter a estudantes e docentes en auténticos arquitectos de contidos, abrindo novas vías cara a unha aprendizaxe máis significativa e experiencial.
Versy AI
Con Versy AI, o profesorado pode deseñar espazos virtuais interactivos a partir de texto, simplemente describindo en poucas palabras o contorno que precisa (por exemplo: “un laboratorio de ciencias futurista” ou “unha cidade medieval con mercado”). A aplicación xera de maneira automática un escenario 3D inmersivo, perfecto para actividades educativas centradas na exploración, a narración ou a aprendizaxe contextualizada. Aínda que aínda se atopa en fase de acceso restrinxido (waitlist), Versy abre a porta a integrar experiencias espaciais na aula sen necesidade de coñecementos de modelado nin de programación.